ONDERTV.ORG

31 Mart Azərbaycanlıların soyqırımı gününə həsr olunmuş tədbirdən lövhələr
Martın 28-də  Quba Soyqrımı  Memorial kompleksi və Xaçmaz Tarix Diyarşünaslıq muzeyinin birgə təşkilatçılığı ilə 31 Mart Azərbaycanlıların soyqırımı gününə həsr olunmuş " Unudulmayan tarix " adlı tədbir keçirilmişdır. Tədbir iştirakçıları əvvəlcə Quba soyqırım qurbanlarının abidəsini ziyarət etmiş, kompleksin ərazisində fəaliyyət göstərən muzey ilə tanış olmuşlar. 
      Tədbir faciə qurbanlarının və vətən uğrunda canlarından keçmiş şəhidlərin xatirəsinin bir dəqiqəlik sükutla yad edilməsi ilə başlanılmış, daha sonra Quba soyqırımına həsr olunmuş film  nümayiş olunub. 
     Tədbirdə Azərbaycan xalqının məruz qaldığı soyqırımı aktları ilə bağlı çıxışlar səslənildı. Azərbaycan Mətbuat Şurası İdarə Heyətinin üzvü, Əməkdar jurnalist Azər Həsrət, Quba Soyqrım Memorial Kompleksinin direktoru, tarix üzrə fəlsəfə doktoru Rəxşəndə Bayramova, Xaçmaz Tarix Diyarşünaslıq muzeyinin direktoru Pakizə Mehdiyeva və digər iştirakçıların çıxışlarında 1918-ci ilin 30 mart-3 aprel tarixində Bakı şəhərində və Bakı quberniyasının müxtəlif bölgələrində daşnak erməni silahlı dəstələri azərbaycanlılara qarşı soyqırım aktının törədilməsi haqqında dolğun məlumat verdilər.
     Rəsmi mənbələrə əsasən, soyqırımın nəticəsində 12 minə yaxın azərbaycanlı qətlə yetirilmiş, on minlərlə insan itkin düşmüşdür.
 Çıxışlarda  soyqırım şahidlərinin ifadələri, tarixin bilinən və bilinməyən tərəfləri, Cənubi Azərbaycanda törədilən erməni vəhşilikləri haqqında faktlardan danışıldı. Təsadüfən aşkar edilmiş kütləvi Quba məzarlığı, 1918-ci ilin may ayında bolşevik adı altında quldur erməni dəstələri tərəfindən törədilmiş Qubanın müsəlman əhalisinin soyqırımı və Xocalı soyqırımı ilə bağlı faktlar erməni lobbisinin dünya ictimaiyyəti üçün yaratdığı ermənilərin yalançı soyqırımı faktını ifşa etmək üçün ən tutarlı cavabdır. 
Azərbaycanlılara qarşı baş vermiş bu dəhşətli soyqırım aktına ilk siyasi qiymət Azərbaycan Xalq Cümhuriyyəti, ilk hüquqi qiymət isə Ulu Öndər Heydər Əliyev vermişdir.
Azərbaycan dövlət müstəqilliyini bərpa etdikdən sonra xalqımızın tarixi keçmişinin obyektiv mənzərəsini ortaya qoymaq imkanı yarandı. İndi uzun illər gizli saxlanılan, üzərinə qadağa qoyulmuş həqiqətlər bir-bir açılır. Ulu öndər Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə soyqırımı aktlarına siyasi-hüquqi qiymət verilməsi bu sahədə aparılan tədqiqatlara, həqiqətin üzə çıxarılması istiqamətində səylərin artırılmasına təkan verdi. Azərbaycan xalqına qarşı törədilmiş bütün soyqırımı faciələrini qeyd etmək məqsədilə 31 Mart Azərbaycanlıların Soyqırımı Günü elan edildi.
HAŞİYƏ:
2007-ci ildə Quba şəhərində tikinti məqsədilə aparılan qazıntılar zamanı təsadüfən aşkar edilmiş kütləvi məzarlıq 1918-ci ilin may ayında bolşevik adı altında quldur erməni dəstələri tərəfindən törədilmiş Qubanın müsəlman əhalisinin soyqırımının əyani sübutu olmusdur. Bu həqiqətləri dünya ictimaiyyətinə çatdırılması, Azərbaycan xalqının gələcək nəsillərinin milli yaddaşının qorunması və soyqırımı qurbanlarının xatirəsinin əbədiləşdirilməsi məqsədilə Azərbaycan Respublikası Prezidenti cənab İlham Əliyev 30 dekabr 2009- cu il tarixli sərancamı ilə Quba şəhərində “Soyqırımı Memorial Kompleksi“nin yaradılmasına qərar vermişdir. Memorial Kompleks 2012-2013-cü illərdə Quba şəhərində Qudyalçayın sol sahilində, keçmiş stadion ərazisində inşa edilmiş və 2013- cü il sentyabrın 18-də açılmışdır.
Ehtiramla anırıq.
Gülxar RƏHİMLİ,
QUBA.